Nga sulmet e Ukrainës në territor rus janë plagosur pesë persona, përfshirë tre fëmijë, në rajonin e Kurskut, tha guvernatori i këtij rajoni të marftën. Guvernatori Alexei Smirnov tha se sistemet e mbrojtjes ajrore ruse kanë rrëzuar të paktën 26 dronë që Ukraina lëshoi gjatë natës. Disa ndërtesa banimi janë dëmtuar nga sulmet në rajonin e Kurskut, që gjendet në kufi me Ukrainën, tha Smirnov përmes një postimi në Telegram. Në një postim tjetër, Smirnov tha se edhe një ditë më herët Ukraina ka sulmuar me dronë këtë rajon, që gjendet në kufi me Ukrainë, ndërsa pretendoi se Rusia ka shkatërruar 41 dronë të Kievit. Si Moska, ashtu edhe Kievi, rrallë herë pranojnë përgjegjësinë për dëmin real të shkaktuar nga sulmet që kryejnë. Ukraina ende nuk ka bërë ndonjë koment për këtë sulm dhe Kievi thotë shpesh se sulmon shënjestrat e ushtrisë ruse dhe infrastrukturën e energjisë, për të penguar luftën. Ndërkohë, sipas guvernatorit të Kurskut, forcat ruse kanë penguar edhe një përpjekje të ukrainës për të carë kufirin. Alexei Smirnov tha se ushtarët dhe forcat kufitare të Shërbimit Federal të Sigurisë kishin zmbrapsur një sulm ukrainas në rajon. Kanali MASH Telegram, i cili ka kontakte me sigurimin shtetëror ruse, tha se rreth 100 luftëtarë ukrainas ishin përpjekur të hynin në Rusi në zonën Sudzha të rajonit të Kurskut.