Ukraina shënjestroi të martën Moskën dhe Rusinë perëndimore në një nga sulmet e saj më të mëdha me dronë, duke vrarë të paktën një grua, duke shkatërruar dhjetëra shtëpi dhe duke detyruar mbylljen e aeroporteve kryesore në kryeqytet, thanë zyrtarët rusë. Ukraina nisi tufat e dronëve kamikazë mbi fuqinë më të madhe bërthamore në botë. Rusia tha se shkatërroi të paktën 20 dronë mbi rajonin e Moskës, i cili ka një popullsi prej mbi 21 milionë banorësh, dhe 124 të tjerë në tetë rajone të tjera. Tre nga katër aeroportet e Moskës u mbyllën për trafikun ajror pas sulmeve, tha autoriteti rus i aviacionit Rosaviatsia. Një rrugë kryesore që të çon në kryeqytet u mbyll pjesërisht. Sulmet me dron dëmtuan të paktën dy ndërtesa shumëkatëshe në lagjen Ramenskoye të rajonit të Moskës, duke u vënë flakën banesave, tha guvernatori i Moskës, Andrei Vorobyov. Një grua 46-vjeçare vdiq dhe tre persona u plagosën në Ramenskoye, tha Vorobyov. Ai shtoi se 43 persona u evakuuan në qendrat e akomodimit të përkohshëm. Videot në mediat sociale treguan flakët që shpërthyen nga dritaret e një ndërtese banimi shumëkatëshe, ndërsa zyrtarët u cituan të thonin se dhjetëra banesa u dëmtuan në lagjen Ramenskoye. "Unë dola në dritare dhe pashë një top zjarri," tha Alexander Li, një banor i lagjes. "Dritarja u drodh nga vala e goditjes", shtoi ai. Më shumë se 70 dronë u rrëzuan gjithashtu mbi Bryansk të Rusisë dhe dhjetëra të tjerë mbi rajone të tjera, tha ministria ruse e mbrojtjes. Ndërsa Rusia përparon në Ukrainën lindore, Kievi është përpjekur ta çojë luftën në Rusi me një sulm të guximshëm në rajonin perëndimor të Kurskut të Rusisë që nisi më 6 gusht dhe sulme gjithnjë e më të mëdha me dronë thellë në territorin rus. Industria vendase e dronëve në Ukrainë është rritur me shpejtësi dhe Kievi ka shtuar sulmet mbi infrastrukturën ruse të energjisë, ushtrisë dhe transportit. Sulmi i së martës vjen pas një morie dronësh të lëshuar nga Ukraina në fillim të shtatorit, që kishin në shënjesër kryesisht objektet e energjisë në Rusi.