Një depozitë nafte është përfshirë nga zjarri mëngjesin e së hënës në Feodosia, në Krimenë e okupuar, si pasojë e një sulmi ukrainas me dronë, raportuan kanalet ruse në Telegram. Banorët thanë se dëgjuan disa shpërthime të fuqishme rreth orës 4:30 të mëngjesit në Feodosia, pas të cilave shpërtheu një zjarr. Depozita e feodosias është më e madhja në krime për lëvizjen e produkteve të naftës. Në sevastopol ekziston vetëm një depozitë dhe terminal tjetër i këtij lloji. Autoritetet e instaluara nga Rusia në Krime konfirmuan se një depo nafte është përfshirë nga zjarri, pa përmendur sulmin me dronë. Oleg Kryuchkov, këshilltar i kryetari të caktuar nga Rusia në Krime, shkroi në Telegram se nuk kishte viktima. Mediat ndërkohë raportojnë për zjarre dhe shpërthime gjatë natës edhe në bazat ajrore Balbek dhe Saki në Krime. Në anën tjetër, Ministria ruse e Mbrojtjes tha në Telegram se sistemet kundërajrore ruse rrëzuan 21 dronë mëngjesin e së hënës, prej të cilëve 12 mbi Krime, 6 mbi rajonin e Kurskut dhe të tjerët mbi rajonet Belgorod, Briansk dhe Voronezh. Ministria e mbrojtjes tha në një deklaratë se tentativat e regjimit të kievit për të kryer sulme terroriste, duke përdorur dronë ajrorë kundër shënjestrave në territorin e federatës ruse, janë ndalur. Krimea u aneksua nga Rusia më 2014, ndërsa Kievi do që ta rimarrë atë, teksa po lufton kundër pushtimit të plotë rus prej 17 muajsh.