Luftimet mes Rusisë dhe Ukrainës vijojnë të intensifikohen, me viktima dhe të plagosur në të dyja palët. Sipas autoriteteve të emëruara nga Rusia në rajonin e pushtuar të Zaporizhias, sulmet ukrainase kanë lënë të paktën 8 persona të vrarë, mes tyre edhe dy fëmijë. Presidenti ukrainas, Volodymyr Zelensky, deklaroi se forcat ukrainase kanë goditur në Detin Kaspik anije të përfshira në transportin e ngarkesave ushtarake nga Irani, si dhe një anije luftarake. Ndërkohë, forcat ruse kanë ndërmarrë një tjetër sulm gjatë natës ndaj qytetit Sloviansk në rajonin e Donjetskut. Të paktën 15 persona mbetën të plagosur, përfshirë një 15-vjeçar. Një ditë më parë, bombardimet ruse në të njëjtën zonë shkaktuan 5 viktima dhe 9 të plagosur. Sulme të reja janë raportuar edhe në rajonin verilindor të Sumyt, ku të paktën tre persona humbën jetën. Sipas autoriteteve ukrainase, objektiv i sulmeve ishin infrastruktura civile dhe zonat pranë ndërtesave të banimit. Nga ana tjetër, Ukraina lëshoi gjatë natës dronë me rreze të gjatë veprimi drejt qytetit rus të Jekaterinburgut, rreth 1.700 deri në 1.800 kilometra larg kufirit me Ukrainën. Përplasjet mes dy vendeve vazhdojnë të rrisin shqetësimin e komunitetit ndërkombëtar, ndërsa nuk ka ende sinjale për një ulje të tensioneve apo rifillim të bisedimeve për paqe.