Ukraina është duke e finalizuar një marrëveshje me një kompani globale të sigurimit për të mbuluar anijet me drithëra që udhëtojnë drejt dhe nga portet e saj në Detin e Zi, raportoi të hënën Financial Times duke cituar zëvendësministrin e ekonomisë të Ukrainës, Oleksandr Gryban. Ky i fundit tha se marrëveshja ishte duke “u diskutuar në mënyrë aktive” mes ministrive përkatëse, si dhe bankave vendase dhe grupeve ndërkombëtare të sigurimeve, përfshirë kompaninë Lloyd's të Londrës. Gjatë muajit gusht, presidenti i Ukrainës, Volodymyr Zelensky, paralajmëroi se Ukraina do t’i kundërpërgjigjet sulmeve të Rusisë në Detin e Zi, në mënyrë që të mundë të importojë dhe eksportojë drithëra dhe mallra të tjera përmes ujërave të tij. Kjo deklaratë e Zelenskyt, erdhi pak ditë pasi dronët detarë ukrainas, të mbushur me eksplozivë, dëmtuan një anije luftarake ruse, pranë një porti rus, dhe e goditën edhe një cisternë ruse të naftës. Tensionet brenda dhe përreth Detit të Zi ishin përshkallëzuar në korrik, kur Rusia u tërhoq nga marrëveshja e cila mundësonte eksportin e sigurt të drithërave nga portet e Ukrainës. Rusia i ka goditur vazhdimisht me dronë dhe raketa portet dhe magazinat e drithit ukrainas. Rusia u tërhoq nga marrëveshja, e ndërmjetësuar nga Turqia dhe Kombet e Bashkuara, pasi tha se nuk janë plotësuar kërkesat e saj.