“Mos i dorëzoni ishujt Chagos”. Presidenti i Shteteve të Bashkuara, Donald Trump, ka kritikuar ashpër planin e Mbretërisë së Bashkuar për t’ia transferuar Ishujt Chagos Mauritiusit, duke paralajmëruar se “dorëzimi i ishullit strategjik Diego Garcia do të ishte një gabim i madh për Londrën dhe aleatët e saj”, raporton “BBC”. Në një reagim publik në “Truth social”, Trump u shpreh se territori “nuk duhet t’i merret Mbretërisë së Bashkuar” dhe se një vendim i tillë do të hapte “një plagë për aleatin tonë të madh”. Nga ana tjetër, Ministria e Jashtme britanike ka mbrojtur marrëveshjen, duke e cilësuar atë “thelbësore për sigurinë e Mbretërisë së Bashkuar dhe aleatëve të saj”. Sipas Londrës, kjo është e vetmja mënyrë për të garantuar të ardhmen afatgjatë të bazës ushtarake në Diego Garcia, një nga pikat më të rëndësishme strategjike në Oqeanin Indian. Ishulli më i madh i arkipelagut përdoret prej dekadash si bazë e përbashkët ushtarake nga forcat britanike dhe amerikane. Sipas marrëveshjes së shpallur në majin e kaluar, Mbretëria e Bashkuar do ta japë Diego Garcian me qira për një periudhë 99-vjeçare. Trump tha se i kishte komunikuar kryeministrit britanik Keir Starmer se “kontratat e qirasë nuk janë të mira kur bëhet fjalë vende si këto”, duke e cilësuar marrëveshjen si humbje kontrolli mbi një pikë kyçe strategjike. Ai argumentoi se ishulli ka një rol vendimtar për sigurinë ndërkombëtare dhe paralajmëroi se mund të jetë vendimtar në rast tensioni me Iranin. Presidenti amerikan theksoi se, nëse negociatat me Teheranin për programin bërthamor nuk japin rezultat, baza e Diego Garcias mund të përdoret për operacione ushtarake, duke e cilësuar regjimin iranian si “shumë të paqëndrueshëm dhe të rrezikshëm”.