Inteligjenca ushtarake ukrainase tha se një depo ruse e dronëve Shahed-136 u përfshi nga një zjarr që shkatërroi pjesë me vlerë 16 milionë dollarë, sipas një postimi në Telegram të Drejtorisë Kryesore të Inteligjencës në Ministrinë e Mbrojtjes të Ukrainës. Në postimin e saj, GUR shkruante: "Zjarri shkatërrues misterioz ishte një tjetër goditje për kompleksin ushtarak-industrial të Rusisë terroriste. Drejtoria e Përgjithshme e Inteligjencës Ushtarake e Ministrisë së Mbrojtjes së Ukrainës kujton se do të ketë një ndëshkim të drejtë për çdo krim lufte të kryer kundër popullit ukrainas". Fabrika e dronëve Yelabuga, rreth 1300 km larg nga kufiri me Ukrainën, në Zonën e Posaçme Ekonomike Alabuga të Rusisë, prodhon dronë Shahed për ushtrinë e Moskës, të cilët janë dronë kamikazë iranianë. Goditja e depos nga Ukraina është domethënëse, sepse shkatërrimi i shkaktuar vjen pasi Moska përballet me mungesë pajisjesh që ka arritur në nivelin më të lartë. Sulmi është gjithashtu një nga shumë goditjet që Kievi ka kryer mbi vendet ku ruhen municionet dhe mbi fabrikat e prodhimit të armatimeve të Rusisë, në përpjekje për të dobësuar aftësinë e Moskës për të vazhduar luftimet.