Zyrtarët rusë thanë se Ukraina ka kryer sulme me dronë në orët e para të kësaj të diele, duke shënjestruar disa rajone të Rusisë. Objektiv ishin kryesisht rafineritë dhe infrastruktura e energjisë kryesisht në territorin e Mosës dhe Tverit. Ministria ruse e Mbrojtjes, sipas agjencisë shtetërore të lajmeve TASS, tha se 158 dronë u shkatërruan nga sistemi i mbrojtjes ajrore. Mbrojtja shkroi në Telegram se numri më i madh i dronëve – 122 gjithsej – u rrëzuan mbi rajonet e Kurskut, Brianskut, Voronezhit dhe Belgorodit, që gjenden në kufi me Ukrainën. Por pretendimet e Rusisë, BBC, nuk ka mundur që t’i konfirmojë. Nga ana tjetër Ukraina nuk ka dhënë detaje lidhur me këtë ofensivë. Kjo breshëri sulmesh me dronë vjen disa ditë pasi infrastruktura e energjisë së Ukrainës u shënjestrua me mbi 200 dronë rusë dhe raketa, në një prej sulmeve më të mëdha të këtij lloji të ndërmarrë nga Kremlini. Po ashtu vjen një muaj që kur Ukraina nisi ofensivën e saj në rajonin rus të Kurskut, edhe pse trupat ruse raportohet se po bëjnë përparim në lindje të Ukrainës, veçmas në rajonin e Donjeckut.