Në mes të luftës, Ukraina që e ka mbrojtur veten për gati dy vjet kundër pushtimit rus, po e sfidon sërish Moskën duke festuar Krishtlindjet për herë të parë më 25 dhjetor, në vend të datës 7 janar që mbart në vetvete simbolika të lidhjes me Rusinë. Mirëpo, përkundër afrimit të festave të fundvitit, luftimet nuk kanë ndaluar. Presidenti i Ukrainës, Volodymyr Zelensky, kishte firmosur në korrik një ligj për të zhvendosur festën zyrtare të Krishtlindjes nga 7 janari, ditën kur festohet Krishtlindja nga Kisha Ortodokse Ruse, në 25 dhjetor. Në ligj thuhej se qëllimi ishte “braktisja e trashëgimisë ruse”. Ky ndryshim bën që besimtarët ortodoksë të Ukrainës të festojnë Krishtlindjen bashkë me besimtarët katolikë të vendit, të cilët në fillim të këtij viti miratuan një ndryshim të ngjashëm në kalendar. Në fjalimin e tij të përnatshëm, të postuar ndërkohë që Ukraina përgatitej për ta shënuar këtë festë, Zelensky tha: “Sot, të gjithë ukrainasit janë bashkë”.