Sekretari amerikan i Shtetit, Antony Blinken tha se Ukraina ka rikthyer gjysmën e territorit që Rusia kishte marrë fillimisht nën kontroll që kur nisi pushtimin, por Kievi përballet me "një luftë shumë të vështirë" për të siguruar avancimin e mëtejshëm. "Tashmë është siguruar rreth 50% e territorit që u mor fillimisht," tha Blinken në një intervistë për CNN-in të dielën. "Janë ende ditë relativisht të hershme të kundërofensivës. Është e vështirë," tha ai, duke shtuar se nuk bëhet fjalë për një ose dy javë, por për muaj. Në fund të muajit të kaluar, presidenti Volodymyr Zelenski u citua të thoshte se përparimi i kundërofensivës ukrainase kundër forcave ruse ishte "më i ngadaltë nga ç’dëshirohej". Ukraina ka rimarrë disa fshatra në jug dhe territorin përreth qytetit të rrënuar të Bakhmutit në lindje, por nuk ka shënuar përparime të konsiderueshme kundër frontit rus të fortifikuar rëndë. I pyetur nëse Ukraina do të marrë avionët luftarakë F-16 të prodhuar nga SHBA, Blinken tha se besonte se po.