Presidenti francez Emmanuel Macron tha të hënën se Ukraina duhet të ketë një pozicion realist për çështjet territoriale si pjesë e përpjekjeve për tu ulur në negociata me Rusinë. Duke folur në një konferencë vjetore me ambasadorët francezë, para të cilëve parashtroi strategjinë për vitin 2025, Macron duket se për herë të parë sugjeroi se Kievi duhet të merrte në konsideratë një pozicion përtej kërkimit të rifitimit të të gjithë territorit të marra nga Rusia. Moska, e cila aneksoi Krimenë në vitin 2014, nisi pushtimin e plotë të Ukrainës në shkurt 2022 dhe aktualisht kontrollon rreth një të pestën e vendit, duke përfshirë pjesën më të madhe të rajonit lindor të Donbasit. “Ukrainasit duhet të zhvillojnë një diskutim real për çështjet territoriale dhe vetëm ata mund ta bëjnë këtë... ne evropianët do të punojmë për ndërtimin e garancive të sigurisë që do të jenë përgjegjësia e tyre”, tha Macron. Roli i Shteteve të Bashkuara të amerikës duhet të jetë që të bindë Rusinë që të ulet në tryezën e negociatave, tha ai, ndërsa shtoi se asnjë zgjidhje për konfliktin nuk mund të arrihet pa përfshirjen e drejtpërdrejtë të Ukrainës dhe Evropës. Macron përsëriti se aleatët e Ukrainës duhet të sigurojnë që Kievi të ketë mbështetje të mjaftueshme në mënyrë që të mund të hyjë në çdo negociatë nga një pozicion i fortë. Macron sidoqoftë nuk bëri asnjë premtim të ri specifik për të ndihmuar Ukrainën. "Nuk do të ketë një zgjidhje të shpejtë dhe të lehtë," tha Macron, duke iu referuar premtimit të presidentit të zgjedhur të Shteteve të bashkuara të amerikës, Donald Trump, për t'i dhënë fund luftës shpejt.