Tirana zyrtare reagoi pas deklaratës së presidentit ukrainas, Volodymyr Zelensky se Kievi nuk ka ndryshuar qasje sa i takon mosnjohjes së pavarësisë së Kosovës. Kjo deklaratë u bë nga Beogradi gjatë një komunikimi të përbashkët me presidentin serb, Aleksandër Vuçiç dhe erdhi në ndërkohë që Prishtina i është bashkuar sanksioneve evropiane dhe të Shteteve të Bashkuara kundër Rusisë për shkak të luftës në Ukrainë. Ministria e Punëve të Jashtme e Shqipërisë thotë se çdo përpjekje për të vendosur një paralele ose për të krijuar një ekuacion midis Kosovës dhe çdo situate tjetër ndërkombëtare është e gabuar, oportuniste dhe thellësisht çorientuese. “Ashtu siç Shqipëria qëndron, dhe do të vazhdojë të qëndrojë, fort në mbështetje të sovranitetit, pavarësisë, integritetit territorial dhe të ardhmes evropiane të Ukrainës, ne mbështesim dhe qëndrojmë po aq fort për sovranitetin, pavarësinë dhe vendin që i takon Kosovës në familjen euroatlantike. Nuk duhet të ketë keqkuptime në këtë pikë: çdo përpjekje për të vendosur një paralele ose për të krijuar një ekuacion midis Kosovës dhe çdo situate tjetër ndërkombëtare është e gabuar, oportuniste dhe thellësisht çorientuese. Rasti i Kosovës qëndron mbi themelet e veta historike, politike dhe ligjore. Me kërkesë të Asamblesë së Përgjithshme të OKB-së, Gjykata Ndërkombëtare e Drejtësisë ishte e prerë: Shpallja e pavarësisë së Kosovës nuk shkeli të drejtën ndërkombëtare. Agresioni i Rusisë kundër Ukrainës është një çështje krejtësisht e ndryshme. Ai përbën një shkelje të rëndë të Kartës së OKB-së dhe të drejtës ndërkombëtare, si dhe një shkelje flagrante të rendit ndërkombëtar të bazuar në rregulla.” Ministria e Punëve të Jashtme shton në reagimin e saj se Ballkani Perëndimor duhet të ecë përpara, jo prapa. “Nga perspektiva e Shqipërisë, një parim është themelor: një Ballkan Perëndimor paqësor, i qëndrueshëm dhe evropian kërkon pranimin e realitetit dhe pakthyeshmërisë së pavarësisë së Kosovës. Ne gjithashtu mbajmë fuqimisht qëndrimin se Serbia dhe Kosova i përkasin një të ardhmeje të përbashkët evropiane.” – thuhet në reagimin e ministrisë.