Presidenti ukrainas, Volodymyr Zelensky, prezantoi një plan, që ai beson se do të ndryshonte drejtimin e luftës në favor të Kievit, dhe do të mund t’i jepte fund konfliktit me Rusinë, jo më larg se vitin e ardhshëm. Në një fjalim të mbajtur para Parlamentit ukrainas, të mërkurën, Zelenski bëri thirrje që “partnerët t'i heqin kufizimet për përdorim të armëve me rreze të gjatë veprimi në gjithë territorin ukrainas të pushtuar nga Rusia, në territorin rus dhe në infrastrukturën ushtarake të armikut”, dhe të ofrohet ndihmë në “furnizimin e brigadave rezervë”. Në “Planin e fitores” të përbërë prej pesë pikave, ai ka hedhur poshtë mundësinë e copëtimit të territorit ukrainas, dhe ka bërë thirrje që Kievi të ftohet për t’iu bashkuar aleancës ushtarake të NATO-s, dhe që ai të pajisjet me një paketë strategjike parandaluese jobërthamore. Lideri ukrainas tha se do të prezantojë hollësitë e planit të enjten në një samit të Bashkimit Evropian, që do të mbahet në Bruksel. Ai pohoi se planin e ka diskutuar me liderë të Shteteve të Bashkuara, Mbretërisë së Bashkuar, Francës, Italisë dhe Gjermanisë. Zëdhënësi i Kremlinit, Dmitry Peskov, tha ndërkohë se Ukraina duhet të “kthjellohet”, dhe e akuzoi Zelenskin se vetëm ka “kamufluar” një plan amerikan. Moska kundërshton hapur anëtarësimin e Ukrainës në NATO, dhe një mundësi të tillë e përdor si pretekst për luftën në Ukrainë. Kievi priste të merrte një përgjigje për planin, në një takim që do të mbahej në bazën Ramstein në Gjermani, javën e kaluar, por takimi u shty për shkak se presidenti amerikan, Joe Biden kishte anuluar udhëtimin. Zelensky tha se pret përgjigje për planin para zgjedhjeve presidenciale të 5 nëntorit në Shtetet e Bashkuara meqë një fitore e kandidatit republikan, Donald Trump mund të zbehë përkrahjen e Uashingtonit.