Mbledhin borë për ta shkrirë e për ta përdorur si ujë në shtëpi; flenë me doreza, pallto dhe kapele; ngrohin tullat në soba me gaz për pak më shumë ngrohtësi; banorët e Kievit po bëjnë gjithçka që munden për të mbijetuar në dimrin më të ftohtë dhe më të errët të luftës. "Kur nuk ka energji elektrike, nuk ka ngrohje: kjo do të thotë që apartamenti ngrin", thotë Anton Rybikov, babai i dy fëmijëve tre dhe dy vjec. Ushtaraku 39-vjeçar tha se njëri nga djemtë e tij kohët e fundit u sëmur me pneumoni pasi temperatura në apartament ishte 9 gradë Celsius gjatë një ndërprerjeje të energjisë elektrike prej më shumë se 19 orësh pas sulmeve ajrore ruse. "Është shumë e vështirë", shton Rybikov, ndërsa përgatitet të ngrohë ujin në një kazan metalik. "Ky dimër është më i vështiri", thotë ai. Rusia ka intensifikuar sulmet e saj ndaj infrastrukturës energjetike të Ukrainës në muajt e fundit, duke përqendruar sulmet me raketa dhe dronë në qytetet e Kievit, Kharkivit dhe Dnipros. Inteligjenca ushtarake britanike vlerësoi se Rusia lëshoi 55,000 sisteme ajrore pa pilot në Ukrainë vitin e kaluar, rreth pesë herë më shumë se në vitin 2024.