Top News – Ukraina mund të tërhiqet nga Bakhmuti / Ashpërsohet beteja për qytetin, sulmet valë-valë

Luftime të ashpra u zhvilluan në qytetin e Bahmutit, tha ushtria ukrainase më 3 mars, ndërsa forcat e Ukrainës zbrapsën valët e shumta të sulmeve ruse në rajonin lindor të Donjeckut. Përveç Bahmutit, i cili ka qenë epiqendra e luftimeve në lindje të vendit për muaj të tërë, ushtria ukrainase zbrapsi të paktën 85 sulme nga forcat ruse në drejtim të qyteteve Liman, Avdijivka dhe Shakhtarsk në këtë rajon, si dhe në rajonin verilindor të Harkivit, tha Shtabi i Përgjithshëm i ushtrisë ukrainase në raportin e tij të përditshëm. Pas humbjes së një pjese të territorit në pjesën e dytë të vitit të kaluar, Moska nisi një ofensivë të re në rajonin e Donbasit të Ukrainës, duke kërkuar të shtyjë forcat ukrainase në disa pika.