Parlamenti i Ukrainës miratoi një projekt-ligj të enjten për të rishikuar rregullat mbi të cilat ushtria mobilizon civilët në radhët e saj, ndërsa lufta duket se do të vazhdojë pa fund. Legjislacioni, i cili duhet të firmoset nga presidenti Volodymyr Zelenski përpara se të bëhet ligj, shihet si vendimtar për Ukrainën për të trajtuar ato që analistët ushtarakë thonë se janë probleme të mëdha të fuqisë luftarake, pasi vendi është përballë një armiku më të mirëarmatosur dhe më të madh. Projektligji u miratua me një shumicë prej 283 votash pas muajsh diskutime, shkroi Yaroslav Zhelezniak, një ligjvënës për partinë Holos, në aplikacionin e mesazheve Telegram. Një tekst i plotë, përfundimtar me të gjitha ndryshimet nuk është publikuar ende në faqen e internetit të parlamentit. Është bërë e ditur sidoqoftë se ligji nuk vendos asnjë kufi për kohëzgjatjen e mobilizimit në luftë, një cështje kjo shumë e ndjeshme për mijëra ukrainas që iu bashkuan ushtrisë kur Rusia nisi pushtimin në shkallë të plotë. Ligjvënësi Oleksandr Fedienko tha se miratimi i ligjit për mobilizimin dërgon një "mesazh të qartë te partnerët e Ukrainës, se ne jemi gati të rimarrim territorin tonë dhe kemi nevojë për armë".