Sulmet e mëdha me dronë ukrainas ndaj Rusisë mbollën kaos në aeroportet kryesore që i shërbejnë Moskës të hënën, duke bërë që mijëra pasagjerë të prisnin në radhë ose të flinin në dysheme pasi fluturimet u anuluan ose u vonuan, raportuan mediat ruse. Videot e publikuara nga mediat ruse treguan njerëz që flinin në dyshemenë e Sheremetyevos, aeroportit më të ngarkuar të Rusisë për nga numri i pasagjerëve, mes radhëve të gjata. Ministria e mbrojtjes e Rusisë tha se kishte rrëzuar 117 dronë gjatë natës, përfshirë 30 mbi rajonin e Moskës ndërkohë që një ditë më parë kishte raportuar se kishte rrëzuar 172 dronë ukrainas, nga të cilët 30 mbi rajonin e Moskës. Autoriteti i aviacionit civil rus, Rosaviatsiya, vendosi shkurtimisht kufizime në fluturimet gjatë natës në aeroportet kryesore të Moskës - Sheremetyevo, Vnukovo, Domodedovo dhe Zhukovskiy. Disa mijëra njerëz mbetën të bllokuar në lindjen e largët të Rusisë për shkak të anulimit të fluturimeve në Rusinë Evropiane, ndërsa trena shtesë u vunë në shërbim për të sjellë pasagjerët në Moskë nga qyteti verior rus i Shën Petersburgut, thanë mediat ruse. Moska dhe rajoni përreth saj kanë një popullsi prej të paktën 21.5 milionë banorësh.