Në fund të dhjetorit SHBA i ofruan Ukrainës edhe njëherë armë dhe pajisje ushtarake në vlerën 250 milionë dollarë, e ndoshta kjo ishte ndihma e fundit pasi për sa kohë që Kongresi Amerikan nuk miraton mjete të reja për Ukrainën, nuk mund të miratohet një paketë e re. Por a do të mundej pjesa tjetër e perëndimit të zëvendësonte furnizimet amerikane? Një nga përbërësit më të rëndësishëm të ndihmës ushtarake amerikane ishin predhat 155 mm të artilerisë, një municion standard që përdoret edhe nga vendet e NATO-s. Por dy vjet pas luftës dhe furnizimeve të vazhdueshme për Ukrainën, janë konsumuar shumë nga rezervat e partnerëve perëndimorë. Europa megjithë premtimet për mbështetjen e Ukrainës, nuk e ka rritur sa duhet prodhimin. Nga shkurti 2022, vetëm SHBA e ka furnizuar Ukrainën me 1,5 milionë predha. BE ka premtuar se Ukraina deri në pranverë 2024 do të marrë 1 milionë predha. Por shifrat të thonë, se janë dërguar vetëm 300.000 predha, shumë më pak se ishte planifikuar. Disa vende të BE e kanë kuptuar emergjencën për furnizim: Gjermania psh. planifikon të vendosë në dispozicion deri në vitin 2024, 200.000 predha të tilla. Edhe Britania e Madhe, Finlanda, Norvegjia dhe disa vende të tjera kanë bërë premtime të ngjashme. Së fundmi u shfaqën në front madje predha 155 mm të prodhuara në Indi, megjithëse origjina e tyre e saktë nuk dihet. Pavarësisht njoftimeve të bëra furnizimet e vendeve të tjera janë në sasi shumë më të vogla krahasuar me furnizimet e SHBA. Nëse SHBA mbetet e pavendosur në mbështetjen ushtarake për Kievin, artileria ukrainase do të përballet me probleme serioze furnizimi. Megjithë premtimet perëndimore, prodhimi i municionit kërkon kohë, edhe nëse vendosen linja të reja prodhimi në punë. E nëse SHBA ndal furnizimet për sistemet më komplekse të armëve, pasojat do të jenë akoma më të rënda. Bëhet fjalë për raketat e sistemeve të mbrojtjes ajrore, NASAMS dhe Patriot si edhe raketa për sistemin HIMARS dhe tanket mbrojtës AT-4 e Javelin. Është e vërtetë që ka vende të tjera, që kanë armë të tilla, si Australia, Norvegjia, Holanda, Lituania etj, po sasia e municioneve që kanë ato në dispozicon është shumë më e vogël se ajo e SHBA. Edhe nëse vende të tilla teorikisht do të zëvendësonin mungesën e furnizimeve të SHBA, kjo nuk do të zgjaste shumë, sepse rezervat e këtyre vendeve do të shteronin shumë më shpejt se ato të SHBA.