Ministria e Brendshme e Ukrainës ka lëshuar fletë-arresti për kreun e Kishës Ortodokse serbe, patriarkun Kirill, duke e future atë në listën e personave në kërkim, me akuzat për nxitje të konfliktit. Natyrisht bëhet fjalë për një masë me karakter simbolik, pasi patriarku Kirill jeton në Rusi dhe është e pamundur që të arrestohet nga Ukraina. Megjithatë me këtë masë, autoritetet ukrainase synojnë të çrrënjosë ndikimin e klerikëve fetarë, të cilët mbajnë lidhje të ngushta me Rusinë, dhe përçajnë shoqërinë ukrainase. Besimi i krishterë ortodoks është feja dominuese në Ukrainë, dhe autoritetet ukrainase kanë hapur së fundi disa raste penale kundër klerikëve të lidhur me një degë të Kishës Ortodokse, e cila më parë ka pasur komunikim direkt me Kishën e Rusisë dhe Kirillin. Parlamenti në Kiev është duke e shqyrtuar një projektligj që ndalon veprimtarinë e asaj dege, me arsyetimin se ajo i ka humbur shumicën e famullitarëve prej nisjes së luftës. Patriarku Kirill i ka dënuar këto veprime dhe u ka bërë thirrje klerikëve në botë, që të veprojnë për t’i ndalur hapat e Ukrainës kundër kishës. Kirilli është një nga zërat më të fortë që mbështet luftën e Rusisë në Ukrainë.