Ukraina ka bërë sërish thirrje për anëtarësim në NATO, duke thënë se vetëm duke iu bashkuar plotësisht aleancës mund të garantohet siguria e saj në të ardhmen, ndërsa lufton pushtimin rus, të nisur gati tre vjet më parë. “Ne jemi të bindur që garantuesi i vetëm real për sigurinë e Ukrainës, si dhe faktori parandalues për agresion të mëtejmë rus kundër Ukrainës dhe vendeve tjera, është anëtarësimi i plotë i Ukrainës në NATO”, tha Ministria e Jashtme e Ukrainës përmes një deklarate të lëshuar para takimit të ministrave të Jashtëm të vendeve të NATO-s në Bruksel. Duke reaguar ndaj kësaj deklarate, zëdhënësi i Kremlinit, Dmitry Peskov tha se anëtarësimi i Ukrainës në NATO, do të ishte “i papranueshëm” dhe do të përbënte “kërcënim” për Rusinë. Këto deklarata vijnë vetëm disa ditë pasi presidenti ukrainas, Volodymyr Zelensky tha se pranimi i Ukrainës në NATO, do t’i jepte fund asaj që e ka quajtur “fazë të nxehtë të luftës”. Zelensky tha për Sky Neës se do të ishte i gatshëm të shqyrtonte mundësinë e një armëpushimi nëse territoret e papushtuara të Ukrainës do të viheshin nën mbrojtjen e NATO-s, dhe për aq kohë sa një ftesë për t’iu bashkuar aleancës do të njihte kufijtë ndërkombëtarë të Ukrainës. Ministri i Jashtëm ukrainas, Andriy Sybiha, pritet të informojë ministrat e Jashtëm të vendeve të NATO-s në Bruksel, për situatën aktuale në vijën e frontit në lindje të vendit. Atje raportohet se trupat ruse kanë shënuar përparim të kufizuar kundrejt ushtrisë ukrainase me numër të më vogël trupash dhe me më pak armë. Në takimin në Bruksel pritet të diskutohet për vazhdimin e ndihmës ushtarake të NATO-s për Ukrainën, si dhe për sulmin që kreu rusia muajin e kaluar, me një raketë balistike eksperimentale mbi qytetin ukrainas, Dnipro. Rusia tha se raketa e re me rreze të mesme veprimi, e quajtur Oreshnik, mund të godasë shënjestra përreth Evropës dhe nuk mund të ndalet nga mbrojtjet ajrore.