Shtetet e Bashkuara presin që operacioni ushtarak ndaj Iranit të përfundojë brenda pak “javësh, jo muajsh”. Kështu u shpreh Sekretari Amerikan i Shtetit, Marko Rubio. Ai pohoi gjithashtu pas takimit të G7-ës se vendet aleate janë kundër çdo përpjekjeje të Teheranit për të vendosur tarifa mbi kalimin e anijeve në Ngushticën e Hormuzit. Nga ana tjetër, Garda Revolucionare iraniane shpalli ngushticën “të mbyllur” për anijet që lidhen me vendet armike, duke rritur tensionet në një nga rrugët më të rëndësishme për furnizimin global me energji. Megjithëse Uashingtoni pretendon goditje të forta ndaj arsenalit iranian, burime të inteligjencës thonë se vetëm një pjesë e tij është shkatërruar, duke lënë ende kapacitete për kundërpërgjigje. Ka sinjale për bisedime mes palëve dhe i dërguari special i SHBA, Stiv Uitkof deklaroi se negociatat do të rinisin javën e ardhshme, por në terren dhe në tregjet financiare mbizotëron pasiguria. Ndërkohë, Izraeli ka vijuar sulmet ndaj objekteve bërthamore në Iran, ndërsa situata humanitare në Liban po përkeqësohet. Sipas UNICEF, mbi 370 mijë fëmijë janë zhvendosur nga luftimet, ndërsa Izraeli synon krijimin e një “zone sigurie” në jug të vendit.