Një grup hakerësh i dyshuar për lidhje me Iranin ka hyrë në llogarinë personale të email-it të drejtorit të FBI-së, Kash Patel. Lajmi është konfirmuar nga vetë FBI, e cila thekson se bëhet fjalë për të dhëna të vjetra dhe jo për informacion zyrtar qeveritar. Grupi që mban emrin “Handala Hack Team” publikoi në internet dokumente të supozuara dhe foto personale të Patel, duke paralajmëruar se “ky është vetëm fillimi”. Sipas FBI-së, sulmi kishte në shënjestër një llogari personale dhe jo sistemet e institucionit, çka redukton ndjeshëm rrezikun për sigurinë kombëtare. Megjithatë, agjencia ka shpallur një shpërblim deri në 10 milionë dollarë për çdo informacion që çon në identifikimin e anëtarëve të këtij grupi. Dyshimet janë se ndërhyrja në komunikimet private të Patel mund të ketë ndodhur që në vitin 2024, përpara se ai të merrte detyrën si drejtues i FBI-së. Ekspertët e sigurisë kibernetike sugjerojnë se publikimet e fundit mund të jenë riciklim i të dhënave të komprometuara më herët. “Emailet duken të vjetra dhe ka gjasa të jenë marrë në një periudhë tjetër kohore, për t’u përdorur tani për efekt propagandistik”, u shpreh një eksperte e sigurisë kibernetike për mediat ndërkombëtare.