Mercenarë që buzëqeshin, të armatosur deri në dhëmbë...kështu propaganduesi rus i luftës Sergei Sreda u shfaq në një vizitë në shtabin qendror të Vagner në Ukrainë, javën e kaluar, duke thënë se ata e kishin mirëpritur si të ishin një familje. Por, Sreda mund ti ketë dënuar mercenarët e Vagner, qoftë edhe pa dashje, me vdekje pasi ka zbuluar në foto vendndodhjen e bazës në qytetin e pushtuar Popasna. Në një foto të postuar prej tij shihej një tabelë rruge. Dhe kaq iu desh ukrainasve për të ndërmarrë një sulm me raketat amerikane HIMARS. Konfirmimi i sulmit erdhi të dielën kur kanalet në telegram me lidhje me grupin Vagner nisën të postonin foto të pas sulmit, përfshirë edhe ushtarë që transportoheshin me barrela. E ky është vetëm më i fundit nga telashet me të cilat po përballen forcat e Putinit, në thuajse gjashtë muaj luftë, pasi më herët u detyruan të tërhiqen nga Kievi, u fundos luftanija e krenarisë së rusisë në detin e zi Moskva, u larguan nga Ishulli i Gjarprit dhe një javë më parë, u pa e shkatërruar edhe një bazë ajrore ruse në Krime.