Dy ura janë shembur gjatë natës në incidente të ndara në rajonet ruse që kufizohen me Ukrainën, duke vrarë të paktën shtatë persona dhe duke plagosur dhjetëra të tjerë. Një urë u shemb në Bryansk, duke bërë që disa kamionë të rëndë të përmbyseshin dhe një tren pasagjerësh të dilte nga shinat, të shtunën vonë, tha guvernatori rajonal. Shërbimet e emergjencës thanë se të paktën shtatë persona humbën jetën. Të paktën 47 persona të tjerë u dërguan në spital, përfshirë një fëmijë, tha guvernatori Alexander Bogomaz. Hekurudha e Moskës tha në Telegram se ura u shemb si rezultat i "ndërhyrjes së paligjshme". Orë më vonë, një urë e dytë u shemb në Zheleznogorsk, duke nxjerrë nga shinat një tren, tha guvernatori në detyrë Alexander Khinshtein. Treni u përfshi nga flakët dhe një prej makinistëve pësoi lëndime, tha guvernatori. "Shkaku i shembjes së urës do të përcaktohet. Të gjitha shërbimet e emergjencës po punojnë në vendngjarje. Po e mbajmë situatën nën kontroll", shkroi ai në telegram. Nuk është e qartë nëse dy incidentet në rajonet fqinje janë të lidhura dhe Ukraina ende nuk ka bërë komente. Imazhet e postuara online nga Bryansku tregonin vagona të dëmtuar dhe pasagjerë që ndihmonin njëri-tjetrin të dilnin nga rrënojat në errësirë. Zyra e prokurorit të transportit ndërrajonal të Moskës tha se kishte nisur një hetim. Autoritetet thanë se lokomotiva e trenit dhe disa vagona dolën nga shinat kur ura u shemb. Punonjës shtesë të emergjencave, si dhe pajisje shpëtimi janë dërguar në zonë, sipas agjencisë ruse të lajmeve TASS. Treni po shkonte nga qyteti i Klimovës për në Moskë, thanë zyrtarët. Pasagjerët u evakuuan dhe u vendosën në një qendër aty pranë, tha Hekurudha e Moskës, duke shtuar: "Ata do të jenë në gjendje të vazhdojnë udhëtimin e tyre në një tren tjetër". Incidenti i parë ndodhi rreth 100 km nga kufiri i Ukrainës.