Forcat e Kievit sulmuan rajonin e Kurskut në Rusi, që kufizohet me Ukrainën me dhjetëra dronë, duke vrarë një grua të moshuar, duke plagosur nëntë persona dhe duke shkaktuar zjarre në disa ndërtesa në qendrën administrative të rajonit, thanë autoritetet ruse të martën. Ministria ruse e mbrojtjes, e cila publikon vetëm numrin e dronëve të shkatërruar nga forcat e saj dhe jo numrin e dronëve të lëshuar nga Ukraina, tha se 109 dronë u rrëzuan mbi rajonin e Kurskut gjatë natës. “Kursku i është nënshtruar një sulmi masiv gjatë natës”, tha administrata e rajonit në një postim në aplikacionin e mesazheve Telegram. Fatkeqësisht, një grua 85-vjeçare ka ndërruar jetë”. Një ndërtesë shumëkatëshe banimi u dëmtua si rezultat i sulmit me dron, dhe disa shtëpi morën flakë, thanë autoritetet. Ndërkohë sipas tyre, një numër banorësh janë evakuuar dhe janë vendosur në një shkollë në rajon. Administrata e rajonit postoi foto të një pallati shumëkatëshe me dritare të thyera dhe dëmtime nga zjarri në fasadë. Dronët goditën gjithashtu një garazh ambulancash, duke dëmtuar 11 makina. Të hënën në mbrëmje, tre persona u vranë në rajon si rezultat i një sulmi me dron ukrainas, thanë zyrtarët. Të dyja palët mohojnë të kenë shënjestruar civilët në luftë, por mijëra civilë kanë humbur jetën në konflikt, shumica dërrmuese e tyre ukrainas. Kursku dhe rajonet e tjera ruse në kufirin me Ukrainën kanë qenë shënjestër e sulmeve të shpeshta ajrore dhe tokësore nga forcat e Kievit, të cilat thonë se qëllimi i tyre është të minojnë përpjekjet e përgjithshme të luftës të Moskës. Trupat ukrainase vitin e kaluar organizuan një inkursion ndërkufitar në rajonin e Kurskut duke marrë nën kontroll territore të gejra. Forcat ukrainase mbeten ende në disa pjesë të rajonit, megjithëse forcat ruse kanë rimarrë territorin e humbur. Sulmi në Kursk vjen pas një sulmi me raketa në qytetin ukrainas të Sumit gjatë fundjavës që vrau 35 njerëz dhe plagosi të paktën 119.