Presidenti Volodymyr Zelenski tha se forcat ukrainase po shkaktonin humbje të mëdha në një kundërsulm në rajonin lindor të Donetskut, teatri kryesor i më shumë se 3 vjet e gjysmë lufte në Ukrainë. Desklarata e Zelenskit, e bazuar në një raport nga komandanti i lartë i Ukrainës, ishte në kontrast me fjalimin e liderit të Kremlinit Vladimir Putin drejtuar oficerëve të lartë rusë një ditë më parë, në të cilin ai tha se forcat e Moskës kishin iniciativën strategjike në të gjithë sektorët e vijës së frontit. Zelenski, në fjalimin e përnatshëm të tij, tha se kishte folur për gati një orë me komandantin e lartë Oleksandr Syrskyi, me "vëmendje të veçantë në operacionin Dobropillia, kundërsulmin e Kievit". Ai foli për viktima të shumta në zonë. Ukraina ka vënë në dukje sukseset në Dobropillia, pak në veri të qendrës logjistike të Pokrovskut, një nga objektivat kryesorë në përparimin e ngadaltë të Rusisë drejt perëndimit përmes rajonit të Donetskut. Forcat ukrainase, tha Zelenski, po "mbrohen në të gjitha drejtimet e tjera", duke iu referuar konkretisht Kupianskut, një qytet kryesisht i shkatërruar në verilindje të Ukrainës nën sulme të rënda ruse për muaj të tërë. Ai gjithashtu i përshkroi kushtet si "të vështira" rreth Novopavlivka-s, më në jug në rajonin e Zaporizhzhias, por tha se "veprimet tona aktive mbrojtëse atje po tregojnë rezultate të mira". Në anën tjetër, Putin u tha oficerëve të lartë të martën se Rusia kishte rimarrë pothuajse 5,000 km katrorë tokë në Ukrainë në vitin 2025. Ai tha se forcat ukrainase po tërhiqeshin në të gjitha sektorët e frontit dhe se pavarësisht se Kievi po përpiqej të godiste thellë në territorin rus, kjo nuk do të ndihmonte.