Ukraina po siguron "fitime të mëdha politike" nga ofensiva e saj ushtarake në Rusinë perëndimore, por inkursioni nuk e ndryshon "qasjen e perëndimit kundër përshkallëzimit", tha Ministri i Brendshëm polak Tomasz Siemoniak. Ukraina thotë se ka kapur më shumë se 80 vendbanime dhe mbi 1,150 km katrorë në Kursk që nga 6 gushti, në pushtimin më të madh të Rusisë që nga Lufta e Dytë Botërore. "Kjo ofensivë nuk ndryshon qëndrimin e perëndimit kundër përshkallëzimit" tha Siemoniak, i pyetur nga Reuters nëse arritjet ushtarake të Kievit mund të ndryshojnë qëndrimin e aleatëve të tij për përdorimin e armëve që ata furnizojnë për luftën e tij me Rusinë. Qeveritë perëndimore që ofrojnë ndihmë ushtarake për Ukrainën pas pushtimit të Rusisë në shkurt 2022 deri më tani kanë refuzuar të lejojnë Ukrainën të përdorë armë me rreze të gjatë për shkak të rrezikut të perceptuar të përshkallëzimit të konfliktit. "Unë mendoj se për vendet perëndimore kjo është një ngjarje që shtyn në drejtim të ndryshimit të imazhit të Ukrainës, përfitimet politike të Kievit janë të mëdha pas më pak se dy javësh," tha Siemoniak. Shtetet e Bashkuara deri më tani e konsideron inkursionin e Ukrainës në rajonin e Kurskut një veprim mbrojtës të përshtatshëm për Kievin për të përdorur pajisjet amerikane, thanë zyrtarët në Uashington këtë javë, por ata shprehën shqetësime për komplikime të mundshme ndërsa trupat ukrainase shtyhen më tej në territorin e armikut. Varshava ka qenë një nga aleatët më të vendosur të Ukrainës dhe kryeministri polak Donald Tusk mbajti një qëndrim të ngjashëm me Uashingtonin në fillim të kësaj jave, duke thënë se Ukraina kishte të drejtën e plotë për tu përgjigjur në një mënyrë që do të paralizojë Rusinë. Një këshilltar presidencial ukrainas tha të premten se inkursioni ndërkufitar i Kievit në rajonin Kursk të Rusisë ishte i nevojshëm për të bindur Moskën që të fillonte bisedimet e paqes në kushte më "të drejta".