Kryeministri i ri i Japonisë, Shigeru Ishiba, paralajmëroi në fjalimin e tij të parë të premten se "Ukraina e sotme mund të jetë Azia Lindore e nesërme", duke thënë se bota po ndahet gjithnjë e më shumë. Ish-ministri i mbrojtjes 67-vjeçar, i cili mori detyrën këtë javë, e quajti gjithashtu normën e ulët të lindjeve në vend një "urgjencë të heshtur". Ishiba nuk iu referua drejtpërdrejt Kinës, por marrëdhëniet e Japonisë me fqinjin e saj janë përkeqësuar vitet e fundit pasi Pekini rrit praninë e tij ushtarake rreth territoreve të diskutueshme në rajon. Për Japoninë, Shtetet e Bashkuara dhe aleatët e tjerë, pretendimet e Kinës mbi Tajvanin demokratik janë një shqetësim i veçantë. Pekini kurrë nuk ka hequr dorë nga përdorimi i forcës për të vënë nën kontrollin e tij ishullin e vetëqeverisur. "Shumëkush ka frikë se Ukraina e sotme mund të jetë Azia Lindore e së nesërmes. Pse nuk funksionoi parandalimi në Ukrainë?" pyeti Ishiba në parlament. Sipas tij, kombinuar me situatën në Lindjen e Mesme, komuniteti ndërkombëtar po bëhet gjithnjë e më i ndarë dhe konfrontues. Japonia ka zemëruar gjithashtu Kinën me planet për një rritje të madhe të shpenzimeve të mbrojtjes dhe duke rritur lidhjet e sigurisë me Shtetet e Bashkuara dhe aleatët e tjerë, përfshirë Filipinet dhe Korenë e Jugut. Në gusht, një avion ushtarak kinez kreu inkursionin e parë të konfirmuar nga Kina në hapësirën ajrore japoneze, e ndjekur javë më vonë nga një anije luftarake japoneze që lundroi përmes ngushticës së Tajvanit për herë të parë. Ishiba ka mbështetur krijimin e një aleance ushtarake rajonale përgjatë linjave të NATO-s, duke thënë të martën se mjedisi i sigurisë në Azi është "më i ashpëri që nga fundi i Luftës së Dytë Botërore".