Liderët e Francës dhe Gjermanisë thanë se Ukraina duhet të lejohet të godasë shënjestrat ushtarake brenda Rusisë, prej të cilave forcat ruse po lëshojnë raketa mbi tokën ukrainase. Megjithatë, presidenti i Francës Emmanuel Macron, dhe kancelari gjerman Olaf Scholz, thanë se shënjestrat e tjera brenda Rusisë nuk duhet të goditen nga Kievi. “Ne e mbështesim Ukrainën dhe nuk duam përshkallëzim. Kjo nuk ka ndryshuar”, tha Macron gjatë një konference të përbashkët për shtyp me Scholz në Meseberg të Gjermanisë. “Ne mendojmë se duhet t’i lejojmë ata që t’i neutralizojnë zonat ushtarake nga të cilat po lëshohen raketat; zonat ushtarake prej të cilave po sulmet Ukraina. Por ne nuk duhet t’i lejojmë ata të godasin shënjestrat e tjera në Rusi, as zonat e tjera ushtarake e civile në Rusi”, shtoi ai. Scholz tha se është në një mendje me Macron dhe se Ukrainës i lejohet të mbrojë veten për sa kohë që respekton kushtet e vendeve nga të cilat furnizohet me armë dhe respekton ligjin ndërkombëtar.