Një zyrtar i emëruar nga rusia në rajonin jugor të Ukrainës, Zaporizhia, pranoi të dielën se Kievi ka rimarrë nën kontroll një fshat në rajon, fitorja e parë në këtë front që nga fillimi i kundërofensivës, më herët këtë muaj. Zyrtari, Vladimir Rogov, tha se forcat ukrainase kishin marrë fshatin Piatikhatki dhe se ishin grumbulluar atje duke u vënë nën zjarrin e artilerisë ruse. “Ofensiva armike ka dhënë rezultate, pavarësisht humbjeve të jashtëzakonshme”, tha Rogov në Telegram. “Luftime të ashpra vazhdojnë në zonë”, shtoi ai. Nuk kishte komente të menjëhershme nga Ukraina dhe agjencia e lajmeve reuters nënvizoi se nuk kishte mundur ta konfirmonte situatën në fushëbetejë. Rusia thotë se i ka shkaktuar humbje të rënda forcave të Kievit dhe presidenti Vladimir Putin deklaroi javën e shkuar se Ukraina nuk kishte shanse për sukses në kundërofensivë. Vetë Kievi tha javën e shkuar se kishte rimarrë nën kontroll një sipërfaqe prej 100 kilometrash katror tokë, në vetëm një javë, duke shtënë në dorë një varg fshatrash në rajonin e donetskut, në lindje.