Luftime të ashpra po zhvillohen në zonën e Bahmutit, Limanit, Avdijivkës dhe Marjinkës në Donjeck, tha Shtabi i Përgjithshëm i ushtrisë ukrainase të mërkurën, duke shtuar se një ditë më parë, në këto zona ka pasur 40 përballje ushtarake. “Luftëtarët tanë kanë vazhduar operacionet ofensive në jug dhe veri të qytetit të Bahmutit”, tha ushtria në përditësimin e fundit. Në njoftim u tha se mbi 15 vendbanime janë sulmuar nga artileria ruse. Ushtria ukrainase tha po ashtu se ushtria ruse ka intensifikuar aktivitetet vëzhguese dhe të sabotimit në zonat kufitare afër qytetit Siverski. Ndërkaq, guvernatorët e Kurskut dhe Belgorodit në Rusi thanë se këto rajone janë sulmuar nga forcat ukrainase përtej kufirit. Sipas tyre, sulmet kanë ndodhur në orët e para të së mërkurës, por nga këto sulme nuk u raportua për viktima. “Qyteti Valujki është nën zjarr nga forcat e armatosura të Ukrainës”, shkroi në Telegram guvernatori i Belgorodit, Vyacheslav Gladkov. “Sistemet tona ajrore funksionuan dhe nuk ka shkatërrim në terren”, shtoi ai. Në një deklaratë të ndarë, Roman Starovoyt, guvernator i rajonit Kursk, në veri të Belgorodit dhe pranë kufirit me Ukrainën, tha se një shkollë dhe një shtëpi private u dëmtuan nga sulmet në fshatin Tjotkino. Në orët e vona të së martës, ushtria ukrainase tha se ka shkatërruar një formacion të forcave ruse në Makijvka në rajonin e Donjeckut, ndërkaq përfaqësuesit e vendosur nga Rusia akuzuan Kievin se ka shënjestruar një spital, duke thënë se një civil u vra dhe 36 të tjerë u plagosën si pasojë e sulmit. “Si rezultat i sulmit efektiv të njësive dhe forcave mbrojtëse, edhe një formacion i terroristëve rusë në Makijvkën e pushtuar përkohësisht, u shkatërrua”, tha ushtria ukrainase.