Dronët ukrainas goditën dy qytete ruse të enjten në sulme që plagosën të paktën 16 persona, thanë autoritetet lokale, një ditë para një samiti SHBA-Rusi mbi luftën në Ukrainë. Trembëdhjetë persona u plagosën, dy prej të cilëve në gjendje të rëndë, kur një dron goditi një ndërtesë apartamentesh në qytetin jugor rus Rostov-on-Don, tha guvernatori rajonal në detyrë. Tre civilë u plagosën në qytetin e Belgorodit pranë kufirit me Ukrainën, sipas guvernatorit të atij rajoni, i cili postoi një video që duket se tregonte një dron që godiste një makinë në qendër të qytetit. Kreu i rajonit të Volgogradit, në Rusi tha ndërkohë se mbetjet e dronëve të rrëzuar ukrainas kishin shkaktuar një zjarr në një rafineri nafte. Nuk pati komente të menjëhershme nga Ukraina. Në anën tjetër, sulmet ruse kanë vrarë të paktën tetë persona dhe kanë plagosur të paktën 18 të tjerë, mes të cilëve edhe fëmijë, në disa rajone të ukrainës në 24 orët e fundit, sipas autoriteteve lokale. Ministria Ruse e mbrojtjes tha ndërkohë të enjten se forcat e saj kishin goditur një uzinë raketash ukrainase, zyra projektimi të armëve dhe ndërmarrje për prodhim karburanti raketash, në korrik. Forcat ruse, sipas saj, shkatërruan një numër sistemesh perëndimore të mbrojtjes nga raketat, duke përfshirë lëshuesit Patriot dhe radarin e kontrollit të zjarrit në rajonet Dnipropetrovsk dhe Sumy, që ishin vendosur për të mbrojtur uzinat, tha ministria. "Një përpjekje nga regjimi i Kievit, së bashku me partnerët e tij perëndimorë, për të organizuar prodhimin e raketave për të kryer sulme thellë në territorin e Federatës Ruse u pengua", tha ministria.