Kombet e bashkuara kanë thënë se plani i japonisë për të derdhur ujin radioaktiv nga centrali bërthamor i shkatërruar i Fukushimës në det, është në përputhje me standartet ndërkombëtare. Agjencia ndërkombëtare për energjinë bërthamore, tha se derdhja e ujit të trajtuar tashmë në det, do të ketë pasoja minimale në ambjent. Vlerësimi vjen në një kohë kur plani i Tokios kundërshtohet nga Pekini dhe Seuli. Centrali i Fukushimës tani nuk ka më vend për ujin i cili përdorej për të ftohur reaktorët bërthamorë. Japonia nuk ka bërë të ditura detajet e derdhjes së ujit të kontaminuar në det dhe plani ka ende nevojë për miratimin përfundimtar nga një rregullator. Në 2011, një tsunami i shkaktuar nga një tërmet me magnitudë 9, dëmtoi tre reaktorë të centralit bërthamor të Fukushimës. Kjo konsiderohet si katastrofa më e rëndë bërthamore në botë, pas Chernobilit. Më shumë se 150 mijë persona u evakuuan nga zona përreth centralit. Pastrimi i ka kushtuar qeverisë japoneze triliona jenë dhe mund të zgjasë për 40 vjet. Ka nisur tani edhe cmontimi dhe shembja e centralit, por procesi do të zgjasë për dekada. Shefi i agjencisë ndërkombëtare për energjinë bërthamore, Rafael Grossi, ishte në japoni të martën ku u takua me kryeministrin Fumio Kishida pikërisht për t’i dhënë atij rezultatet e vlerësimit dy vjecar të bërë nga organi i Kombeve të Bashkuara.