Shtetet e Bashkuara dhe Irani duket se kanë hapësira të kufizuara përveç arritjes së një marrëveshjeje, ndërsa presioni ekonomik, humbjet ushtarake dhe nevojat politike nga të dyja palët po rrisin gjasat për kompromis, sidomos me afrimin e përfundimit të armëpushimit. Raundi i parë i bisedimeve në Islamabad, ka shërbyer për forcimin e pozicionit të SHBA-së, i ndjekur menjëherë nga bllokada detare e porteve iraniane. Sipas CNN, efektet ekonomike të kësaj bllokade pritet të rëndojnë Iranin dhe aleatët e tij, përfshirë Kinën, e varur nga nafta iraniane. Në të njëjtën kohë, presidenti amerikan Donald Trump përballet me presion të brendshëm për shkak të rritjes së inflacionit dhe çmimeve të karburantit, ndërsa Irani po përballet me humbje të konsiderueshme ushtarake dhe pasiguri në udhëheqje, pas bombardimeve që kanë goditur mijëra objektiva.