Të paktën gjashtë raportime për pamje të objekteve fluturuese të paidentifikuara në Greqi janë përfshirë në dosjet e publikuara nga Pentagoni mbi objekte dhe fenomene të pashpjegueshme në mbarë botën. Dosjet janë pjesë e një arkivi me gjithsej 162 dokumente, që përfshijnë raportime nga agjenci federale amerikane, kablograme diplomatike dhe materiale nga misionet e NASA, si dhe të dhëna që shtrihen deri në 80 vite më parë. Materialet janë publikuar në kuadër të një nisme për transparencë të zgjeruar mbi fenomenet ajrore të paidentifikuara. Sipas të dhënave të publikuara, disa nga raportimet që lidhen me Greqinë datojnë nga tetori i vitit 2023 dhe janari i vitit 2024. Një prej incidenteve të raportuara më 27 tetor përshkruan një objekt të vogël, me formë rrethore, që lëvizte shumë ulët mbi det dhe kryente manovra të shpejta përpara se të zhdukej nga radarët. Në dokumente përfshihet edhe një regjistrim komunikimi nga misionet hapësinore të Apollo-s, ku astronautët raportojnë shfaqjen e grimcave ose objekteve shumë të ndritshme gjatë lëvizjes në hapësirë, të cilat më pas i komunikohen qendrës së kontrollit në Tokë.