Shtëpia e bardhë tha se nuk kishte të dhëna se tre objektet fluturuese që u qëlluan në qiell gjatë fundjavës, nga ushtria amerikane, janë të lidhur me spiunazh të mundshëm nga Kina. Objektet mund të jenë të lidhura me entitete komerciale apo kërkimore e si pasoja mund të jenë beninje – tha zëdhënësi John Kirby. Zyrtarët amerikanë dhe kanadezë nuk kanë lokalizuar apo marrë ndonjë pjesë nga tre mjetet e rrëzuara ajrore. Më herët ndërkohë, Pekini akuzoi SHBA për ekzagjerim. Kina ka mohuar se një nga balonat e saj, që u shkatërrua nga një avion ushtarak amerikan më herët këtë muaj mbi karolinën e jugut, përdorej për spiunazh duke thënë se ishte një mjet ajror i monitorimit të motit që kishte dalë jashtë kontrollit. Ndërkohë, Kirby thotë se do të jetë e vështirë të përcaktojë qëllimin apo origjinën e tre objekteve të tjera të shkatërruar mbi Alaskë, kanada dhe Micigan, deri sa mbetjet të gjendeshin dhe të analizoheshin. Ndërkohë, edhe Rumania ka ngritur në fluturim avionët ushtarakë të martën për të hetuar një objekt ajror që hynte në hapësirë ajrore evropiane. Por, ministria e mbrojtjes në vend tha se pilotët nuk kishin mundur ta lokalizonin dhe e kishin braktisur misionin pas një gjysmë ore. Edhe Moldavia mbylli hapësirën ajrore të martën për të hetuar raportet për një objekt në formë balone në qiell, një ditë pasi vendi i vogël i evropës lindore akuzoi Rusinë se po komplotonte të rrëzonte qeverinë atje. Autoriteti i aviacionit civil në Moldavi tha se kishte marrë raporte nga ministria e mbrojtjes se një objekt i vogël, i ngjashëm me një balonë moti, ishte parë në qiell në veri të vendit, afër kufirit me Ukrainën. Në një deklaratë të aviacionit civil u tha se duke patur parasysh kushtet e motit dhe pamundësinë e vëzhgimit dhe identifikimit të objektit dhe trajektores së tij, hapësira ajrore u mbyll. Pasi autoritetet konstatuan se nuk kishte rrezik për sigurinë e qytetarëve, masa u tërhoq, një orë e 22 minuta më vonë.