Ministrja e arsimit, Evis Kushi firmosi udhëzimin e ri për uljen e numrit të nxënësve për klasë dhe ngarkesat mësimore javore të mësuesve Sipas udhëzimit të ri numri mesatar i nxënësve për klasë ulet nga 35 në 30, në të gjitha gjimnazet dhe shkollat e orientuara. Ndërkohë përsa i përket klasave kolektive, në udhëzimin e ri numri i nxënësve ulet nga 25 në 20, për të lehtësuar edhe mësuesit në procesin e mësimdhënies. Disa ndryshime parashikohen edhe në administratën menaxheriale. Shkollat që kanë më shumë se 800 nxënës do të kenë tre nëndrejtorë, ndërkohë që ky numër më parë ka qenë mbi 900 nxënës. Ndër të tjera, në udhëzim thuhet se të gjitha shkollat e arsimit special për nxënësit me aftësi ndryshe, për herë të parë do të kenë edhe nëndrejtor, pavarësisht numrit të nxënësve. Edhe për shkollat e arsimit të orientuar do të rritet numri i nëndrejtorëve, me qëllim menaxhimin më efektiv por edhe mbështetjen e talenteve dhe organizimin e aktiviteteve dhe programeve jashtë kurrikulare. Vitin e kaluar u ul numri i nxënësve në klasa për lëndët artistike dhe grupet e baletit në shkollat koreografike.