Udhëheqësi suprem i iranit Ayatollahu Ali Khamenei është dërguar në një vend të sigurt brenda Iranit në kuadër të masave të shtuara të sigurisë, thanë disa burime për Reuters, një ditë pasi Izraeli vrau kreun e grupit libanez Hezbollah të mbështetur nga Irani në një sulm në Bejrut. Lëvizja për të mbrojtur vendimmarrësin kryesor të Iranit është shfaqja e fundit e nervozizmit nga autoritetet iraniane pasi Izraeli nisi një seri sulmesh shkatërruese ndaj Hezbollahut, aleatit më të ngushtë dhe më të armatosur të Iranit në rajon. Reuters raportoi këtë muaj se Korpusi elitar i Gardës Revolucionare të Iranit, rojet ideologjike të Republikës Islamike, kishte urdhëruar të gjithë anëtarët të ndalonin përdorimin e çdo lloj pajisjeje komunikimi pasi mijëra pagera dhe radio të përdorura nga Hezbollahu shpërthyen. Libani dhe Hezbollahu thonë se Izraeli qëndronte pas sulmeve në pagera dhe pajisjet radio. Izraeli as e mohoi dhe as nuk e konfirmoi përfshirjen. Dy zyrtarët rajonalë të informuar nga Teherani dhe të cilët i thanë Reuters se Khamenei ishte zhvendosur në një vend të sigurt, thanë gjithashtu se Irani ishte në kontakt me Hezbollahun dhe grupe të tjera përfaqësuese rajonale për të përcaktuar hapin tjetër pas vrasjes së tij. Burimet nuk pranuan të identifikoheshin për shkak të ndjeshmërisë së çështjes. Përveç vrasjes së Nasrallahut, sulmet e së premtes nga Izraeli në Bejrut vranë edhe zëvendëskomandantin e Gardës Revolucionare Abbas Nilforoushan, raportuan mediat iraniane të shtunën. Komandantë të tjerë të Gardës Revolucionare janë vrarë gjithashtu që nga shpërthimi i Luftës së Gazës vitin e kaluar. Khamenei lëshoi një deklaratë të shtunën vonë, pas njoftimit të Izraelit se Nasrallahu ishte vrarë, duke thënë: "Fati i këtij rajoni do të përcaktohet nga forcat e rezistencës, me Hezbollahun në krye. Do të merret hak për gjakun e martirit", tha ai në një deklaratë të veçantë në të cilën shpalli edhe pesë ditë zie për të shënuar vdekjen e Nasrallahut.