Me 48 km gardhe të përkohshme, 25,000 oficerë të zbatimit të ligjit dhe pika kontrolli sigurie të ngritura për të filtruar qindra e mijëra spektatorë, Uashingtoni është gati për inaugurimin e Presidentit të zgjedhur Donald Trump javën e ardhshme. Betimi i së hënës në shkallët e Kapitolit të SHBA dhe parada në Shtëpinë e Bardhë do të pasojnë një fundjavë me protesta nga kundërshtarët e Trump dhe partitë si edhe tubime nga mbështetësit e republikanëve. Inaugurimi pason një fushatë të shënjuar nga dy tentativa për të vrarë Trumpin dhe sulme gjatë Vitit të Ri ndaj amerikanëve të zakonshëm. Në njërin prej tyre, 14 persona u vranë dhe dhjetëra u plagosën kur një veteran i ushtrisë amerikane përplasi një kamion në një turmë njerëzish në Neë Orleans. Të njëjtën ditë, një ushtar aktiv i ushtrisë amerikane shpërtheu një Tesla Cybertruck jashtë një hoteli të markës Trump në Las Vegas, duke vrarë veten. "Ne jemi në një mjedis me kërcënim të lartë," tha agjenti i posaçëm i Shërbimit Sekret të SHBA, Matt McCool në një konferencë për shtyp. Vetë inaugurimi, kur Trump të bëjë zyrtarisht betimin, do të mbahet në shkallët e Kapitolit, përballë Monumentit të Uashingtonit. Ky është i njëjti vend ku, më 6 janar 2021, mijëra mbështetës të Trumpit thyen dritaret, u konfrontuan me policinë dhe i detyruan ligjvënësit të vraponin për të shpëtuar jetën e tyre në një përpjekje për të përmbysur humbjen e Trumpit përballë presidentit demokrat Joe Biden. Zyrtarët e sigurisë thanë se nuk ishin në dijeni të ndonjë kërcënimi specifik dhe të koordinuar ndaj inaugurimit. Ajo për të cilën ata shqetësohen janë ata që njihen si ‘ujqërit e vetmuar’, sic ishte edhe sulmuesi i Neë Orleansit. FBI dhe Departamenti i Sigurisë Kombëtare paralajmëruan një ditë më parë për rrezikun e sulmeve të reja. Një pjesë e madhe e qendrës së Uashingtonit, që shtrihet në rreth 3 km nga Shtëpia e Bardhë deri në Kapitol, do të mbyllet për trafikun e automjeteve, me pika hyrëse të bllokuara me barriera betoni. Gardhi rrethues 2 metra i lartë është projektuar për të mos u kapërcyer. Rreth 7,800 trupa të Gardës Kombëtare dhe 4,000 oficerë të sjellë nga departamente të tjera policore anembanë vendit do të përforcojnë sigurinë po ashtu.