Policia ka arrestuar 31-vjeçarin Ergys Arrazi, ndaj të cilit rëndojnë akuzat e dhunës në familje dhe ajo e shkaktimit të vetëvrasjes së vajzës së tij 8-vjeçare. 31-vjeçari, që denoncoi më herët se prej tre ditësh ishte zhdukur bashkëshortja dhe tre fëmijët e mitur të çiftit, 9, 8 dhe 3 vjeç, dyshohet se ka nxitur vetëvrasjen e gruas dhe tre të miturve. Trupi i pajetë i 8 vjeçares është gjetur në lumin Drin nga peshkatarët, ndërsa janë thirrur polumbarët e RENEA-s që po kërkojnë për 39-vjeçaren Alma Arrazi dhe dy fëmijët e tjerë të mitur të saj. Bazuar në hetimet e kryera dhe inteligjenca policore, dyshohet se shkaku i largimit nga banesa ishte dhuna e ushtruar nga 31-vjeçari, ndaj bashkëshortes dhe fëmijëve, të cilët dyshohet se mund të kenë kryer vetëvrasje. Ergys Arrazi rezulton person me precedent penalë, pasi është dënuar për kultivimin e bimëve narkotike.