Një gjykatë ruse ka gjobitur Google me 3.8 milionë rubla ose 41,530 dollarë për një përmbajtje në YouTube që përfshinte video që udhëzonin ushtarët rusë se si të dorëzoheshin, njoftoi të hënën agjencia ruse e lajmeve TASS. Rusia ka urdhëruar prej disa vitesh që platformat e huaja të heqin përmbajtjen që ajo e konsideron të paligjshme, të tilla si ato që Moska i quan "falsifikime" për luftën në Ukrainë, duke vendosur gjoba të vogla por të vazhdueshme sa herë që ka parë që kërkesa e saj nuk është respektuar. Kritikët akuzojnë ndërkohë autoritetet ruse për ndërprerje të qëllimshme të shpejtësisë së shkarkimit të YouTube për të parandaluar rusët të shikojnë përmbajtje në të, cka është në fakt kritike për presidentin Vladimir Putin dhe qeverinë e tij. Rusia e mohon këtë, duke thënë se problemet janë shkaktuar nga dështimi i vetë Google për të përmirësuar pajisjet, një akuzë e kundërshtuar nga kompania dhe ekspertët e teknologjisë. Putin në dhjetor akuzoi Google si një mjet që përdoret nga qeveria amerikane për të fituar pikë politike.