Papa Francesku ka paralajmëruar ndihmësit e tij se mund të mos i mbijetojë sëmundjes me të cilën po lufton në spital dhe po përgatit trashëgiminë e tij, sipas raporteve. Dy njerëz të afërt me Papën pretenduan se Françesku, 88 vjeç, u tha atyre se "mund të mos ia dalë kësaj here", sipas një raporti nga Politico. Papa Françesku u dërgua me urgjencë në spital të premten e kaluar, ku tani është diagnostikuar me pneumoni në të dy mushkëritë. Pavarësisht se Vatikani tha më herët se gjendja e Papës ishte e qëndrueshme, raportet e reja sugjerojnë se ai ka frikë se do të vdesë për shkak të gjendjes së tij dhe po nxiton të përfundojë gjithcka për ti lënë rrugë të lirë pasuesit të tij. Dy ndihmës kanë thënë se Papa po zbaton plotësisht "urdhrat e mjekëve". Thuhet gjithashtu se ai është i shqetësuar pasi u ndalua të mbajë predikimin e tij të rregullt të mëngjesit, Angelus, që ai rrallë herë e ka humbur, madje edhe kur është shtruar në spital. Papa Françesku u shtrua në spitalin Gemelli të Romës më 14 shkurt, pas një jave vuajtjeje nga bronkiti. Thuhet se ai hezitonte të shtrohej, por pranoi pasi mjekët këmbëngulën se shtrimi ishte i domosdoshëm. Më pas, Vatikani tha se do të duhej një qëndrim më i gjatë në spital i atit të shenjtë, pasi kishte një panoramë klinike komplekse që përfshinte një "infeksion polimikrobial të traktit respirator". Ata gjithashtu ofruan shpresë për katolikët në mbarë botën duke thënë se gjendja e Papës ishte "e qëndrueshme". Por të gjitha angazhimet e Papës janë anuluar dhe duket se ai nuk është optimist pasi u konfirmua pneumonia e dyfishtë në mushkëri. Papës i është hequr një pjesë e mushkërisë vite më parë, që do të thotë se ai është veçanërisht i prekshëm ndaj sëmundjeve pulmonare.