Partia Demokratike zyrtare thotë se politikat sociale të Qeverisë së Edi Ramës kanë dështuar dhe sot një e treta e shqiptarëve jeton në kushte të vështira. Zëdhënësja e PD, Mirela Karabina përmes një deklarate iu referua një raporti të Avokatit të Popullit, ku citohet se ndihma ekonomike është më pak se një e dhjeta e nevojës së minimumit jetik. Sipas raportit të Avokatit të Popullit, një në tre shqiptar jetoi në kushte të vështira vitin që shkoi, ndërsa ndihma ekonomike është më pak se 1/10 e nevojës së minimumit jetik. Ky është rezultat i një qeverisjeje të korruptuar, e cila përpara qytetarëve të zakonshëm, ka zgjedhur oligarkët; përpara halleve të njerëzve, ka preferuar komoditetin e saj; përpara rritjes së ndihmës ekonomike, ka vijuar me koncensione korruptive miliona euro, që do të mjaftonin për të rritur rrogat dhe pensionet dhe për t’u ardhur në ndihmë familjeve të varfëra.