Gjatë operacionit për shuarjen e flakëve një ditë më parë në Levan të Fierit, dy efektivë policie të cilët kishin shkuar në ndihmë të banorëve për të luftuar flakët që po përhapeshin drejt ullishteve dhe pronave të tyre, kanë mbetur pa automjetet personale. Sipas të dhënave, efektivët i kishin parkuar makinat në një zonë që e konsideronin të sigurt, përpara se t’u bashkoheshin banorëve. Por situata ndryshoi me shpejtësi. Të favorizuara nga era, flakët ndryshuan drejtim dhe përfshinë edhe zonën ku ishin parkuar automjetet. Kur efektivët u kthyen në vendin ku kishin lënë makinat, i gjetën ato tërësisht të shkrumbuara nga zjarri Ndërsa forcat zjarrfikëse dhe policia ishin të angazhuara në terren për vënien nën kontroll të flakëve dhe mbrojtjen e banesave e pronave të banorëve, zjarri vijoi të përhapej duke shkaktuar dëme të konsiderueshme.