Një konflikt i nisur për motive të dobëta ka përfunduar në mënyrë tragjike mëngjesin e kësaj të marte në lagjen ‘Kongresi i Përmetit’ në Shkodër, ku humbi jetën 24-vjeçari Ylber Luli. I riu ishte i angazhuar në sektorin e turizmit në Shkodër dhe ushtronte profesionin e udhërrëfyesit turistik. Sipas të dhënave paraprake të Policisë, ngjarja ka ndodhur rreth orës 05:30 minuta të mëngjesit, pas një konflikti mes personave që kishin konsumuar alkool. Sherri dyshohet se ka nisur pas ofendimeve mes palëve dhe më pas ka përshkallëzuar në përdorimin e armëve dhe thikave. Nga hetimet paraprake rezulton se 25-vjeçari Andri Vulaj dyshohet se ka qëlluar me armë zjarri ndaj Ylber Lulit dhe babait të tij, Qamil Lulit, 63 vjeç. Në vijim të konfliktit, në rrethana që janë ende duke u hetuar, Qamil dhe Ylber Luli dyshohet se kanë plagosur me thikë 25-vjeçarin Vulaj. Ylber Luli u transportua me urgjencë në spital, por nuk mundi t’u mbijetojë plagëve të marra. Ndërkohë, Policia ka bërë të mundur kapjen e 25-vjeçarit Andri Vulaj. ndërsa grupi hetimor vijon punën për zbardhjen e plotë të rrethanave të ngjarjes dhe përcaktimin e përgjegjësive.