Shtetasi turk, i ndaluar në lidhje me ngjarjen e rëndë në Ksamil ku mbeti i vrarë 20-vjeçari portugez Luis Miguel Varela Mendes, ka dhënë dëshminë e tij para gjykatës. I njohur me Sokrat Vatën për shkak të bashkëpunimit në shoqërimin e turistëve, ka deklaruar se nuk ka qenë i pranishëm në momentin e vrasjes dhe nuk ka parë se çfarë ka ndodhur. Sipas dëshmisë së tij, rreth orës 06:30, ai është telefonuar nga Sokrat Vata, i cili i ka kërkuar ta shoqëronte me makinë në drejtim të Tiranës. Ai ka pretenduar se Vata i ka thënë se ishte rrëzuar nga motori, pa i treguar se çfarë kishte ndodhur më herët në Ksamil. Edhe të ndaluarit e tjerë kanë mbajtur qëndrim mohues para trupit gjykues, duke deklaruar se nuk e kanë parë momentin e përleshjes që i parapriu vrasjes së 20-vjeçarit portugez. Pavarësisht qëndrimit të tij, Gjykata e Sarandës ka vendosur masën “arrest në burg” për shtetasin turk, i cili dyshohet se së bashku me shtetasen tjetër turke Ezgi Parlak tentoi të largonte me makinë Sokrat Vatën pas ngjarjes.