Kryeministrja daneze Mette Frederiksen këmbënguli se ajo nuk po kërkon të marrë drejtimin e NATO-s. “E kam thënë edhe më parë, se nuk po kandidoj për asnjë pozicion tjetër përveç atij që kam tashmë dhe kjo nuk ndryshoi as pas takimit tim me presidentin amerikan”, u tha Frederiksen gazetarëve jashtë Shtëpisë së Bardhë. Sekretari i Përgjithshëm i NATO-s, Jens Stoltenberg do të largohet nga posti në fund të këtij viti. Emri i Frederiksen, si pasardhëse e mundshme, është përfolur shumë javët e fundit. Fredericksen u tha gazetarëve se u takua me zyrtarë të lartë amerikanë në Uashington, por nuk dha detaje nga këto takime. Ndërkohë, kryeministrja daneze u takua edhe me presidentin Joe Biden, dhe në axhendë, biseda mes tyre ishte planifikuar të zgjaste vetëm 45 minuta. Por, ajo doli nga shtëpia e Bardhë vetëm pas dy orësh dhe nuk ofroi shumë detaje për cka kishte folur me presidentin.