Kryeministrja italiane Giorgia Meloni akuzoi ish-aleatin e saj të ngushtë Donald Trump se ka sajuar një histori për të, pasi Presidenti i SHBA-së i tha një kanali televiziv italian se ajo i ishte "lutur" atij të bënin një foto bashkë në një samit të G7-ës. Meloni tha se ishte "e habitur" nga komentet e tij, të cilat ishin "krejtësisht të sajuara". Ajo e akuzoi Trump se tregonte me shumë më tepër respekt ndaj armiqve të Perëndimit sesa ndaj aleatëve të vjetër dhe të vendosur. Shkëmbimi i fundit shënon një përkeqësim të ndjeshëm të marrëdhënieve, që vjen vetëm disa ditë pas shenjave në samitin e G7-ës se dy udhëheqësit e krahut të djathtë kishin stabilizuar një marrëdhënie të acaruar më parë, pas tensioneve për shkak të luftës në Iran. Videoja nga eventi në Francë tregoi Melonin dhe Trumpin të zhytur në bisedë, por udhëheqësi i SHBA-së sugjeroi se ai thjesht e kishte kënaqur atë duke biseduar me të. "Ajo ndoshta është e lumtur që fola me të. Nuk e kisha të nevojshme të flisja me të", citohet të ketë thënë Trump për kanalin televiziv La7 në një intervistë të shkurtër. "Ajo mu lut të bëja një foto me të. Ajo donte shumë një foto me mua. Unë nuk do ta kisha bërë, por më erdhi keq për të", tha Trump.