Është zhvilluar këtë të premte seanca gjyqësore për caktimin e masave të sigurisë ndaj pesë personave të arrestuar mbrëmjen e së hënës në fshatin Gjashtë të Sarandës, të cilët u kapën me dy armë zjarri pistoletë. Në përfundim të seancës, gjykata vendosi masën e sigurisë “Arrest në burg” për Alfred Kajën dhe Sidorel Morisenin, ndërsa për tre të tjerët, Vitrin Hoxhën, Franko Bobjan dhe Vionis Pokën, u caktua masa “Arrest në shtëpi”. Dy të parët u arrestuan nga policia pasi u kapën duke poseduar dy armë zjarri pistoletë, njëra prej të cilave ishte e pajisur me silenciator. Tre të rinjtë e tjerë ndodheshin me ta në momentin e ndërhyrjes së policisë. Fillimisht, hetuesit dyshuan se grupi mund të ishte duke përgatitur kryerjen e një ngjarjeje kriminale. Megjithatë, gjatë kontrolleve nuk u gjetën maska, doreza apo lëndë djegëse, elemente që do të mund të forconin dyshimet për përgatitjen e një krimi. Edhe automjetet me të cilat lëviznin të rinjtë rezultuan me dokumentacion dhe targa të rregullta. Ndërkohë, dëshmitë e dhëna prej tyre para grupit hetimor dhe më pas edhe para gjykatës nuk kanë konfirmuar dyshimet fillestare se ata mund të ishin duke përgatitur një vrasje apo një tjetër ngjarje të rëndë kriminale. Pavarësisht kësaj, hetimet vijojnë për të zbardhur rrethanat e posedimit të armëve dhe lidhjet e mundshme mes pesë të arrestuarve. Sipas burimeve, nuk përjashtohet pista se të rinjtë mund të kenë qenë të përfshirë në ndonjë aferë që lidhet me shitblerjen e armëve të zjarrit. Pesë të rinjtë, kryesisht banorë të zonave të Tiranës dhe Rrogozhinës, nuk rezultojnë me precedentë të theksuar penalë.