Dy shtetas janë proceduar penalisht për tentativë kalimi të shumave të konsiderueshme parash në vend pa i deklaruar, pas kontrolleve të të ushtruara nga Policia Kufitare në pikat e kalimit kufitar. Në një rast, gjatë kontrollit në pikën e kalimit të Rinasit, shërbimet kufitare zbuluan një shumë prej 240 mijë eurosh që një 36 vjeçar banues në Krujë, po tentonte të fuste në Shqipëri pa e deklaruar sipas ligjit. Paratë u sekuestruan dhe ndaj tij nisi procedimi penal për "Mosdeklarimin e të hollave dhe sendeve me vlerë". Materialet u referuan për hetime në Prokurorinë e Tiranës. Ndërkohë, në Pikën e Kalimit Kufitar Kakavijë, një tjetër rast u regjistrua kur një 54 vjeçar, banues në Elbasan, tentoi të nxirrte nga Shqipëria 22 mijë e 250 euro pa i deklaruar. Pas zbulimit, u realizua sekuestrimi i shumës dhe procedimi i tij në gjendje të lirë për mosdeklarimin e parave. Ky rast është dërguar për hetime në Prokurorinë pranë Gjykatës së Shkallës së Parë të Gjirokastrës.